Həyat çox qəribədir...
Hər bir insanın özünəməxsus həyat yolu olur. Bəzi insanların həyat yolu digərlərindən daha ağır, daha məsuliyyətli olur. Belə insanların yükünün ağırlığı həyatda başqalarına kənardan çox yüngül, həsəd doğuracaq qədər asan gəlsə də, onun nələr çəkdiyini, nələrdən keçdiyini, çiyinlərinə düşən yükün ağırlığının həcmini, böyüklüyünü hər insan anlamaz, dərk etməz.
İlham Heydər oğlu Əliyev...
Belə insanlar biz yatan zaman gərgin gecələr keçirər, öhdəsinə düşən məsuliyyətin ağırlığından onların gözlərinə yuxu getməz, dinclik nədir bilməzlər və bütün bunlara baxmayaraq, öz çiyinlərinə düşən yükü tam məsuliyyəti ilə daşımağı bacararlar. Onların sayı barmaqla sayılacaq qədər azdır.
Mən bir yazar kimi, şairə kimi çiyinlərində daşıdığı ağır yükü məsuliyyətlə, əzmlə, hünər və rəşadətlə daşıyan, kiçik vətənini böyük ölkə kimi dünyaya tərənnüm edən, hər bir çətinliklərdən xalqı ilə bərabər, göydə Allahın köməkliyi ilə qalib gəlməyi bacaran əziz və hörmətli prezidentimiz İlham Heydər oğlu Əliyevdən yazmağı özümə borc və eyni zamanda fəxr bilirəm. Sanıram ki, bu ölkədə yaşayıb, bu ölkənin çörəyini yeyirəmsə, havasını uduramsa, bu gözəl insanın vətənimin rifahı, azadlığı naminə gördüyü işlərdən yazmalıyam. Ölkəmizin keçmiş Sovet məkanındakı 15 respublikalar arasındakı inkişafını, qələbəmizi bu gün bizə yaşadan, dünyada qürurla adı çəkə biləcəyimiz, haqqı danılmaz olan əziz prezidentimiz haqda yazmaq mənə asandır. Bu gün bizim Prezidentimiz bizim qürur mənbəyimizdir. Şəxsən mən bir azəri övladı kimi, şairə kimi belə bir prezidentimizin olduğuna çox sevinirəm, ona və onu sevənlərə gözəl Allahımızdan möhkəm can sağlığı, aydın səma və xoş gələcək arzu edirəm.
Çoxlarına asan gələn, lakin həqiqətdə isə yükünün ağırlığının həcmi dərk olunmaz dərəcədə ağır olan və bu yükü çiyinlərində əzmlə daşıyan, haqsız şəkildə daxili və xarici təzyiqlərə məruz qalmasına baxmayaraq, rəşadətlə, qürurla, əzmlə işinin öhdəsindən gələ bilən əziz prezidentimizin haqqı hər birimizin çiyinlərində var və bu danılmazdır.
Əgər nəzərə alsaq ki, Azərbaycan kiçik bir dövlətdir və onun düşmənləri çoxdur, deməli Azərbaycanı bu şəkildə idarə etməyin, dünyaya tanıtmağın və 30 illik əsarətdən qurtarmağın nə dərəcədə çətin, nə dərəcədə ağır olduğunu dərk etmək çox da çətin olmaz. Bütün bunların öhdəsindən İlham Əliyev göydə Allahın, yerdə öz savadının, dərin zəkasının, dünyagörüşünün, rəşadətinin, əzminin və öz xalqına olan sevgi və etibarının sayəsində gələ bilir.
Bəli, mən onun hakimiyyətə gəldiyi dövrdən tam bu günkü günədək vətənimizin inkişafı naminə etdiyi işlərin ölçüsünün böyüklüyünü, Moskvada 11 il yaşayıb vətənə qayıtdığdan sonra gördüm, canlı şahidi oldum. Buna görə də mən öz prezidentimizlə qürur duyuram. Bir atalar sözü var, səhv etmirəmsə, fransızlarındır: “Üç şeyin qarşısını almaq olmaz, Günəşin, Ayın və bir də haqqın...”. Haqqı danılmaz olan şəhidlərimizlə, qazilərimizlə birgə bizi 30 illik erməni əsarətindən qurtaran, hər bir şəhid əbədiyyətə qovuşanda, onların əzizləri ilə birgə ürəyi qan ağlayan göydə Allaha, yerdə xalqına güvənən bu insanın haqqı danılmazdır. Bunu bizə Allah da bağışlamaz. Biz isti evlərimizdə oturub Putini, Paşinyanı televiziya vasitəsilə görəndə nə qədər əsəb, həyəcan, gərginlik keçirirdiksə, bir anlıq düşünün, təsəvvür edin ki, İlham Əliyev, bizim prezidentimiz belə insanlarla canlı ünsiyyətdə, gərgin görüşlərdə, gərgin ünsiyyətdə nə qədər həyəcan, əsəb, gərginlik yaşamışdır. Paşinyanla, Putinlə və bizi sevməyən digər ölkələrin rəhbərləri ilə belə gərgin görüşləri mən döyüş meydançası adlandırıram və belə döyüş meydançalarından qalib çıxan sərkərdəni uca Allahımızın bizə verdiyi lütfü adlandırmağı bir şairə kimi, elqızı kimi, vətən övladı kimi özümə borc bilirəm. İlham Əliyev bizə məhz Allahın lütfüdür. Bu arada, öz sözlərimlə desəm:

Allahın lütfüdür bəzi insanlar,
Tanrıdan hədiyyə gələrlər onlar.
Arifin qədrini ariflər anlar,
Təəssüf ki, azdırlar arif adamlar...

Şeirimdən yenə bir misra yadıma düşdü:

İnsan xoşbəxtliyin nankoru olur,
Səadət gələndə gözü kor olur.

Mən bir azəri övladı kimi, yazar, şairə kimi prezidentimizlə qürur duyur və eyni zamanda xalqımızı bu insanın gördüyü işlərin böyüklüyünü, çəkisini dərk etməyə səsləyirəm. Xalqımızı, vətənimizi sevirəm, prezidentimizə isə ordumuzla birgə bu qələbəni bizlərə yaşatdığına görə, bizi başı aşağı gəzməkdən xilas etdiyinə görə uca Allahdan can sağlığı, uzun ömür və gələcək işlərində uğurlar arzu edirəm. Tanrı qoy yar olsun hər zaman sizə. Dərin və məsuliyyətli işlərinizdə yollarınız hər zaman açıq olsun. Sizi şairə kimi şeirlə təbrik etməyi özümə borc bilirəm.

Prezidentimiz İlham Əliyevə ithaf edirəm...

Qələmimi alıb bu gün əlimə,
Ürək sözlərimi deyirəm sizə.
Bizim qürur yeri, həm də fəxrimiz,
Heydər oğlu İlham prezidentimiz!
Təbrik göndərirəm xalqım adından,
Ey dahi şəxsiyyət, ey gözəl insan.
Sizə yüz il ömür arzulayıram,
Sizi xalqımızın fəxri sanıram.
Yaxşı ki, varsınız ey gözəl insan,
Çox aqil xəlq etmiş sizi Yaradan.
Həm dahi şəxsiyyət, həm gözəl insan,
Sizinlə fəxr edir bütün Azərbaycan.
Olmasaydı siz tək dahi bir insan,
Qalib olardımı heç Azərbaycan?!
Ey dahi şəxsiyyət, ey gözəl insan,
Ey dahi şəxsiyyət, Əliyev İlham!


Hörmətli prezidentimiz İlham Əliyevə dərin hörmət və ehtiramla
Aytəkin Mehmanqızı