Qubadlı rayonu Azərbaycanın cənub-qərbində, Zəngilan, Laçın, Xocavənd və Cəbrayıl rayonları ilə həmsərhəddir. Ərazisinin böyük hissəsi dağlıq və dağətəyi zonalarda yerləşir. Füsunkar təbiəti, sıx meşələri, zəngin fauna və florası, eyni zamanda qədim tarixi abidələri ilə Qubadlı Qarabağın incilərindən biri sayılır. Rayonun mərkəzi olan Qubadlı şəhəri 1923-cü ildə inzibati mərkəz kimi formalaşmış, bölgənin sosial-iqtisadi və mədəni həyatında mühüm rol oynamışdır.
Lakin 1993-cü ilin avqustunda Ermənistan silahlı qüvvələri Qubadlı rayonunu işğal etmişdir. Nəticədə, minlərlə qubadlılı doğma yurd-yuvasını tərk etməyə məcbur oldu. Rayonun ərazisində yerləşən kəndlər, tarixi abidələr, təhsil və mədəniyyət ocaqları, dini məbədlər tamamilə dağıdıldı. Qubadlı şəhəri viran qoyuldu, meşələr yandırıldı, torpaqlar talan edildi. Bu, təkcə bir rayonun deyil, bütövlükdə Azərbaycanın maddi və mənəvi irsinə vurulan ağır zərbə idi. Bu zərbənin cavabı isə ordumuz tərəfindən verildi .2020-ci il sentyabrın 27-də başlayan Vətən müharibəsində Azərbaycan Ordusu Ali Baş Komandan, Prezident İlham Əliyevin rəhbərliyi altında mərdlik və vətənpərvərlik nümunəsi göstərdi. Döyüşlərin gedişatında Füzuli, Cəbrayıl, Zəngilan və ardınca Qubadlı istiqamətlərində mühüm strateji qələbələr qazanıldı.25 oktyabr 2020-ci il tarixində Prezident İlham Əliyev xalqa müraciətində tarixi xəbəri elan etdi:
“Bu gün Azərbaycan Ordusu Qubadlı şəhərini və rayonun bir neçə kəndini işğaldan azad etmişdir. Qubadlı bizimdir! Qarabağ Azərbaycandır!”
Bu xəbər bütün xalqımız tərəfindən sevinclə, göz yaşları ilə qarşılandı. Qubadlının azad olunması həm strateji, həm də mənəvi baxımdan mühüm əhəmiyyət daşıyırdı. Rayonun azadlığı ilə Azərbaycan Ordusu Laçın dəhlizinə yaxınlaşaraq mühüm coğrafi üstünlük qazandı və müharibənin son mərhələsinə – Şuşa uğrunda döyüşlərə yol açdı.
İşğaldan azad olunduqdan sonra Qubadlı rayonunda genişmiqyaslı bərpa və quruculuq işləri həyata keçirilir. Prezident İlham Əliyev və Birinci vitse-prezident Mehriban Əliyeva dəfələrlə Qubadlıya səfər etmiş, yeni yolların, körpülərin, yaşayış massivlərinin, məktəblərin və sosial obyektlərin təməlini qoymuşlar.
“Böyük Qayıdış” proqramı çərçivəsində Qubadlıda “Ağıllı kənd” konsepsiyasına uyğun infrastruktur yaradılır, enerji təminatı, rabitə və internet şəbəkələri bərpa olunur. Artıq bəzi kəndlərin sakinləri öz doğma yurdlarına qayıtmağa başlayıblar.
Bu zəfər şəhidlərimizin qanı bahasına, əsgərlərimizin fədakarlığı sayəsində əldə olundu. Bu gün Qubadlıda Azərbaycan bayrağının dalğalanması dövlətimizin gücünü, xalqımızın birliyini və 30 illik ədalətsizliyin sona çatdığını simvolizə edir.
Qubadlı rayonunun işğaldan azad edilməsi Azərbaycan tarixində dönüş nöqtəsi oldu. Bu hadisə həm milli birlik və qürur simvoludur, həm də gələcək nəsillərə vətən sevgisinin, qəhrəmanlığın ən parlaq nümunəsini göstərir. Bu gün biz əminliklə deyirik: Qubadlı azaddır, Qubadlı yenidən dirçəlir, Qubadlı Azərbaycanındır!.
Azərbaycan Silahlı Qüvvələri tərəfindən rayonunun tamamilə işğaldan azad olunması dövlətimizin suverenliyinin bərpası və ədalətin təntənəsi kimi tarixə yazıldı .

Bakı Qızlar Universiteti tələbəsi Xudaşlı Ləman
Nəsimi rayon gənci