Oktyabrın 10-da Tacikistanın paytaxtı Düşənbədə keçirilən MDB Dövlət Başçıları Şurasının məhdud tərkibdə iclasında Azərbaycan Respublikasının Prezidenti İlham Əliyev mühüm çıxış edib. Prezidentin nitqi təkcə ikitərəfli əlaqələrin və regional əməkdaşlığın inkişafına deyil, həm də mədəni, humanitar və idman sahələrində inteqrasiyanın güclənməsinə dair əhəmiyyətli mesajlarla yadda qalıb.
Öz çıxışının əvvəlində Prezident İlham Əliyev qardaş Tacikistan xalqını ölkə rəhbərliyinin rəhbərliyi ilə əldə olunmuş uğurlar və nailiyyətlər münasibətilə təbrik edib. Dövlət başçısı Düşənbənin son illərdəki inkişafını yüksək qiymətləndirərək şəhərdə aparılan abadlıq və tikinti işlərinin Tacikistanın ümumi tərəqqisinin göstəricisi olduğunu vurğulayıb. Prezident deyib: “Qardaş Tacikistan xalqını Prezidentin rəhbərliyi ilə əldə olunmuş uğurlar və nailiyyətlər münasibətilə təbrik etmək istərdim. Düşənbədə dəfələrlə olarkən ölkənin paytaxtının necə sürətlə inkişaf etdiyini, yeni binaların tikildiyini görürəm. Bütün bunlar bizi dost kimi çox sevindirir. Şəhərsalma sahəsində uğurlar münasibətilə təbrik edirəm və Düşənbənin ildən-ilə gözəlləşdiyinə şadam.” Bu sözlər Azərbaycanla Tacikistan arasında dostluq və qarşılıqlı hörmətin dərin köklərə malik olduğunu bir daha göstərdi.
Prezident İlham Əliyev çıxışında Tacikistan ilə Azərbaycan arasında ikitərəfli münasibətlərin ardıcıl və dinamik inkişaf etdiyini də xüsusi vurğulayıb. Dövlət başçısı qeyd edib ki, iki ölkə arasındakı əlaqələr qardaşlıq, dostluq və qarşılıqlı dəstək prinsiplərinə əsaslanır, həmçinin böyük inkişaf potensialına malikdir. “Tacikistan ilə Azərbaycan arasında ikitərəfli münasibətlər ardıcıl inkişaf edir. Onlar qardaşlıq, dostluq, qarşılıqlı dəstəyə əsaslanır və böyük inkişaf potensialına malikdir.” Prezidentin bu fikirləri regionda sabitlik və əməkdaşlıq üçün əsas şərtlərdən biri olan qarşılıqlı etimad mühitinin güclənməsinə xidmət edir.
İlham Əliyev həmçinin çıxışında Azərbaycanın Şərqi Zəngəzur bölgəsində yerləşən Laçın şəhərinin bu il MDB-nin mədəniyyət paytaxtı kimi seçilməsinə toxunub və bu təşəbbüsü dəstəklədiklərinə görə MDB dövlət başçılarına təşəkkürünü bildirib. O, Laçında keçirilən “MDB-nin mədəniyyət paytaxtı İli”nin açılış mərasiminin əhəmiyyətini qeyd edərək, bu tədbirin Azərbaycanın mədəni irsinin dünyaya tanıdılmasına və region xalqları arasında humanitar əlaqələrin möhkəmlənməsinə xidmət etdiyini vurğulayıb. Prezident bildirib: “Bu ilin iyununda Laçında ‘MDB-nin mədəniyyət paytaxtı İli’nin açılış mərasimi keçirildi, Azərbaycanın bu qədim torpağının tarixi, mədəni irsi haqqında məlumat verildi. Tədbirin qonaqları Laçının Ermənistanın 30 illik işğalından azad ediləndən sonra sürətli dirçəlişinin əyani şəkildə şahidi oldular. Tamamilə dağıdılmış şəhər bir neçə il ərzində ən gözəl və yaşayış üçün rahat şəhərlərdən birinə çevrilib.” Bu sözlər Azərbaycanın bərpa və quruculuq sahəsində qazandığı nailiyyətlərin MDB miqyasında da nümunəvi hal aldığını nümayiş etdirir.
Dövlət başçısı çıxışının davamında MDB məkanında əməkdaşlığın yeni istiqamətlərindən biri olan idman sahəsində birgə fəaliyyətin önəmini qeyd edib. Prezident İlham Əliyev sentyabrın 28-dən oktyabrın 8-dək qədim Gəncə şəhərində keçirilən III MDB Oyunlarının əhəmiyyətindən danışaraq, bu tədbirin təkcə idman yarışları deyil, həm də xalqlar arasında dostluğun və qarşılıqlı anlaşmanın bayramı olduğunu vurğulayıb. O qeyd edib: “Birliyin həyatında daha bir mühüm hadisə sentyabrın 28-dən oktyabrın 8-dək qədim Gəncə şəhərində - XII əsrin dahi Azərbaycan şairi və mütəfəkkiri Nizami Gəncəvinin vətənində keçirilən III MDB Oyunları oldu. Gəncə ilə yanaşı, Azərbaycanın daha altı şəhərində - Qəbələ, Göygöl, Yevlax, Mingəçevir, Xankəndi, Şəkidə 13 ölkədən – həm MDB üzvləri olan, həm də qonaq ölkələrdən 1600-dən çox idmançı qəbul edildi.” Prezident İlham Əliyev qeyd edib ki, bu qəbildən olan tədbirlər MDB məkanında və onun hüdudlarından kənarda dostluğu, əməkdaşlığı möhkəmləndirir, bərabərhüquqlu və qarşılıqlı hörmətə əsaslanan münasibətlərin daha da inkişafına xidmət edir.
Prezidentin bu çıxışı Azərbaycan diplomatiyasının əsas istiqamətlərindən birinin – regional inteqrasiya və multilateral əməkdaşlığın təşviqi – istiqamətində atılmış növbəti addım kimi dəyərləndirilə bilər. İlham Əliyevin Düşənbədəki çıxışı MDB daxilində birliyin möhkəmləndirilməsi, xalqlar arasında dostluq əlaqələrinin dərinləşdirilməsi və mədəni-humanitar əlaqələrin genişləndirilməsi baxımından mühüm əhəmiyyət daşıyır.
Ümumilikdə, Prezident İlham Əliyevin Düşənbədəki nitqi həm Azərbaycan-Tacikistan münasibətlərinin gələcək inkişaf perspektivlərini, həm də MDB məkanında Azərbaycanın artan nüfuzunu və fəal rolunu nümayiş etdirir. Azərbaycanın müstəqillik dövründə formalaşdırdığı sabit və çoxşaxəli diplomatiya, regionda sülhün və inkişafın təmin olunması istiqamətində atdığı addımlar bu çıxışda da aydın şəkildə öz əksini tapdı. Prezidentin sözləri bir daha sübut etdi ki, Azərbaycan həm dostluq, həm də tərəfdaşlıq münasibətlərinə sadiq ölkə olaraq, MDB-nin gələcək inkişafına mühüm töhfələr verməyə davam edəcək.

Bakı Qızlar Universiteti tələbəsi Şəhla Zeynalova
Nəsimi rayon gənci