ABŞ və Qərb Kremlin ən zəif yerlərini tam dəqiqliyi ilə müəyyən edib və ardıcıl sarsıdıcı zərbələr endirir, bu amansız qarşıdurmanın sonrakı mərhələsində də əsas hədəfin Rusiyanı məhz enerji sektoru və maliyyə-iqtisadi müstəvidə tükətmək olacağı artıq qətiyyən şübhə doğurmur... Rusiya isə bu dağıdıcı zərbələrin qarşısını almaqda açıq-aşkar çətinlik çəkir, çünki texnoloji və maliyyə mənbələri getdikcə məhdudlaşır, Ukrayna savaşındakı döyüşlər qədər mühüm olan ikinci cəbhə – iqtisadi-ticari, eləcə də informasiya-propoqanda müharibəsi artıq kollektiv Qərbin xeyrinə çevrilir...
Ölkə.az "Yeni Müsavat"a istinadən xəbər verir ki, Ukrayna savaşı artıq yeni mərhələyə keçmək üzrədir. Belə ki, bu savaş tədricən Rusiya ərazisinə keçirilməyə başlayıb. Kremlin NATO üzvü olan Avropa dövlətlərinə qarşı hərbi təhdidlərə bağlı siyasi şantaj strategiyası indi bumeranq effekti verir və Rusiyaya olduqca baha başa gəlir. Kremlin “neoimperialist kaprizlər”indən bezib, səbri tükənən ABŞ və Qərb Rusiyaya yerini göstərmək taktikasına üstünlük verir. Və bu, kollektiv Qərbin Rusiyaya qarşı hibrid savaşa başlamasına yol açır.

Onu da qeyd etmək lazımdır ki, Rusiya ilə Qərb arasında davam edən savaş artıq yalnız cəbhə xəttində deyil, iqtisadi-ticari və informasiya-propoqanda müstəvisində də kəskinləşib. ABŞ rəsmi dairələrindən səsləndirilən sərt açıqlamalar, Ukraynanın nüvə təhlükəsinə dair xəbərdarlıqları, Rusiyanın enerji sektoruna endirilən sarsıdıcı və ardıcıl zərbələr mövcud hərbi-siyasi qarşıdurmanı artıq yeni mərhələyə daşıyır. Və belə anlaşılır ki, kollektiv Qərb Rusiyanı həm enerji sektoru, həm də “nüvə kartı” ilə küncə sıxışdırmaqda israrlıdır.

_methode_times_prod_web_bin_642e7560-fead-40a3-9549-ad87b7244291.jpg (65 KB)

Məsələ ondadır ki, ABŞ prezidentinin Ukrayana savaşının dayadırılması üzrə xüsusi nümayəndəsi Kit Kelloqun “Rusiya bu müharibəni qazana bilməyəcək” açıqlaması əslində, yalnız bir diplomatın şəxsi fikri sayıla bilməz. Qətiyyən şübhə doğurmur ki, onun mesajları ABŞ-ın yeni strateji yanaşmasının ifadəsidir. ABŞ açıq şəkildə Kremlin uzunmüddətli perspektivdə resurslarını tükəndirmək niyyətini nümayiş etdirir. Kit Kelloqun dedikləri həm Rusiyanın siyasi elitasına, həm də tərəddüd edən Avropa dövlətlərinə ünvanlanmış xüsusi mesajdır. Ağ Ev birmənalı şəkildə təsdiqləyir ki, Kreml artıq əvvəlki kimi qalib mövqeyində deyil, əksinə, Rusiyanın hazırda logistik və maliyyə-iqtisadi problemləri getdikcə ağırlaşır.

Maraqlıdır ki, son vaxtlara qədər Rusiyaya xüsusi rəğbətini gizlətməyən ABŞ lideri Donald Trampın prezident Vladimir Putini “kağızdan pələng” adlandırması isə Kremlin yeni situasiya ilə üzləşdirilməsinə yönəlik bəyanatdır. Ağ Ev sahibi Kremldə mövcud situasiyanın Rusiya üçün artıq ümidsiz olduğunu qabartmağa çalışır. Prezident Donald Tramp bu açıqlama ilə həm də Rusiyanın və onun liderinin imicinə də beynəlxalq müstəvidə sarsıdıcı zərbə vurmağa nail olub. Və son vaxtlar ABŞ siyasi elitası tərəfindən ön planda tutulan bu ritorika daha çox məhz Rusiyanın ən zəif tərəflərinin qabardılması üzərində qurulub.

Digər tərəfdən, Ukrayna siyasi dairələri də nüvə təhlükəsi arqumentini daha qabarıq şəkildə ön plana çəkməklə, kollektiv Qərb daxilində Rusiyaya qarşı sərt mövqeyin vacibliyinə yönəlik əhval-ruhiyyəni mümkün qədər gücləndirməyə çalışır. Belə ki, Ukrayna prezidenti Volodimir Zelenski hazırda Rusiyaya qarşı “informasiya müharibəsi”ni əsasən qlobal nüvə təhlükə kartı ilə aparır. Onun sözlərinə görə, artıq yeddi gündür ki, Zaporojye Atom Elektrik Stansiyası dizel generatorlarının hesabına işləyir və bu, nüvə fəlakətinə yol aça biləcək misilsiz risk yaradır.

1658653216_emcode_490f0c581f8b1444a8fa88fd987c9b0c.jpg (117 KB)

Prezident Volodimir Zelenski beynəlxalq ictimaiyyəti bu təhlükə ilə bağlı susmamağa çağırmaqla, əslində, kollektiv Qərbin Ukraynaya hərbi və siyasi-diplomatik dəstəyini daha da artırmağa çalışır. Bu arqument Ukraynanın əsas informasiya-propoqanda üstünlüyü olaraq, diqqəti çəkir. Çünki əgər, Rusiya nüvə obyektlərinə raket zərbələrini davam edərsə, məsələ artıq yalnız Ukraynanın suverenliyi çərçivəsində müzakirə olunmaqdan kənara çıxmağa başlayacaq. Və bu mövzu daha çox bütün Avropa qitəsinin hərbi təhlükəsizlik məsələsinə çevrilmiş olacaq.

Onu da qeyd etmək lazımdır ki, rəsmi Kiyevin əsas hədəfi kollektiv Qərbdən Rusiyanın dərinliklərinə daha sarsıdıcı zərbələr üçün intensiv və yetərli dəstək alınmasına nail olmaqdır. Rəsmi Kiyev Rusiyanı çökdürə biləcək əsas hədəfləri tam dəqiqliyi ilə müəyyən etməyə də nail olub və Ukrayna ordusu hazırda işğalçı tərəfin enerji sektoruna davamlı dron zərbələri endirməkdədir. Ona görə də, Ukrayna savaşının Rusiya üçün iqtisadi-ticari cəbhəsi getdikcə daha böhranlı məzmun almağa başlayıb. Belə ki, Ukrayna ordusunun dron hücumları nəticəsində Rusiyanın neftayırma zavodlarının üçdə biri artıq fəaliyyətini dayandırıb və ilkin emal gücü 38 faiz azalıb. Və bunun nəticəsində Rusiya gündəlik enerji hasilatını 236 min ton azalmaq məcburiyyətində qalıb.

Ən önəmli məqamlardan biri isə odur ki, Rusiyanın Qərb texnologiyalarına çıxış imkanları məhdudlaşdırıldığı üçün Kreml Ukrayna dronlarının vurduğu neft emalı zavodlarının yenidən bərpası artıq uzun və bahalı prosesə çevrilib. Rusiyanın “Kommersant” nəşri yazır ki, artıq ölkə daxilində benzin istehsalı 20 faizlik qıtlıq həddinə çatıb. Bu, həm daxili bazarda sosial gərginlik yaradır, həm də dövlət büdcəsinin əsas valyuta mənbəyini zəiflədir. Bu proses həm də Rusiya iqtisadiyyatının çöküş prosesini sürətləndirir. Və bu baxımdan, Rusiyanın enerji sektoru hazırda Kreml üçün həm iqtisadi-ticari, həm də siyasi zəiflik nöqtəsinə çevrilməyə başlayıb.

tramp_zelenski_putin.jpg (84 KB)

Mövcud situasiya onu göstərir ki, kollektiv Qərb hazırda Rusiya ilə birbaşa hərbi toqquşmaya girmədən ona qarşı “tükətmə strategiyası”nı davam etdirir. Davam edən iqtisadi sanksiyalar, texnoloji qadağalar, enerji sektoruna zərbələr və informasiya savaşı Rusiyanın uzunmüddətli müqavimət potensialını məhdudlaşdırır. Rusiya taktiki uğurlar qazana bilsə də, strateji müstəvidə həm iqtisadi-ticari, həm siyasi-diplomatik, həm də imic baxımından, uduzan tərəf kimi təsvir olunur. Ukrayna prezidenti Volodimir Zelenskinin “nüvə arqumenti”, Kit Kelloqun sərt açıqlamaları və Ağ Ev sahibi Donald Trampın ironik ritorikası sinxron şəkildə Rusiyanın zəif mövqedə olduğunu qabartmaq məqsədi daşıyır.

Belə anlaşılır ki, ABŞ və Qərb Rusiyanın ən zəif yerlərini tam dəqiqliyi ilə müəyyən edib və ardıcıl sarsıdıcı zərbələr endirir. Bu amansız qarşıdurmanın sonrakı mərhələsində də kollektiv Qərbin əsas hədəfinin Rusiyanı məhz enerji sektoru və maliyyə-iqtisadi müstəvidə tükətmək olacağı artıq qətiyyən şübhə doğurmur. Rusiya isə bu dağıdıcı zərbələrin qarşısını almaqda açıq-aşkar çətinlik çəkir, çünki texnoloji və maliyyə mənbələri getdikcə məhdudlaşır. Və beləliklə, Ukrayna savaşındakı döyüşlər qədər mühüm olan ikinci cəbhə – iqtisadi-ticari, eləcə də informasiya-propoqanda müharibəsi artıq kollektiv Qərbin xeyrinə işləyir.