ABŞ prezidenti Donald Trampın ailəsi bir gündə kriptovalyuta bazarından əldə olunan 5 milyard dollarlıq “kağız mənfəət”lə gündəmə gəlib. Bu barədə “The Wall Street Journal” yazır.

Xəbərə görə, Tramp ailəsinin nəzarətində olan “World Liberty Financial” (WLF) şirkəti tərəfindən yaradılan WLFI tokenləri kriptovalyuta birjalarında satışa çıxarıldıqdan dərhal sonra sərvət partlayışı baş verib. Ailənin payına düşən təxminən 25%-lik hissə açıq bazarda qiymətləndirilərək bir gündə 5 milyard dollarlıq mənfəət gətirib.

Bu məbləğ Tramp ailəsinin illərlə daşınmaz əmlakdan qazandığı gəliri üstələyib. WLFI tokeni qısa müddətdə ailənin ən böyük aktivinə çevrilib.

Tramp ailəsi bu tokenləri real satışa çıxarmasa da, açıq bazarda formalaşan qiymət onların sərvətinə kağız üzərində milyardlarla dollar əlavə edib. Ekspertlər bu durumu maliyyə bazarlarında “virtual zənginləşmə” adlandırır.

Lakin burada mühüm məqam var: tokenlərin hələ satışa çıxarılmaması onların dəyərinin dəyişkənliyini və qeyri-sabitliyini göstərir. Buna baxmayaraq, ictimaiyyət və investorlar Tramp ailəsinin kriptovalyuta sektorunda açdığı yeni səhifədən həyəcanlanır.

Trampın hazırkı statusu – ABŞ prezidenti olması – bu məsələyə siyasi çalar qatır. Bir çox analitiklər bildirirlər ki, siyasətin birbaşa biznes maraqları ilə qarışması etik və hüquqi suallar doğurur.

“The Wall Street Journal” yazır ki, WLF şirkəti ilə digər tərəflər arasında aparılan “daxili dövriyyə” (circular deal) nəticəsində ailənin əlavə 500 milyon dollardan çox gəlir götürməsi ehtimal olunur. Bu isə Tramp ailəsinin kripto layihəsinin təkcə iqtisadi yox, həm də siyasi təsir aləti kimi qiymətləndirilməsinə səbəb olur.

Musavat.com-un müşahidəsinə görə, bu hadisə ABŞ-da iqtisadi və siyasi gündəmi silkələməklə yanaşı, Avropa maliyyə dairələrində də rezonans doğurub. Çünki Tramp administrasiyasının həm maliyyə siyasəti, həm də texnologiyaya verdiyi üstünlük kriptovalyutanın dövlət səviyyəsində legitimləşməsi ehtimalını gücləndirir.

Bir gündə 5 milyard dollarlıq sərvət qazanmaq Tramp ailəsini dünya maliyyə tarixində misilsiz mövqeyə gətirib. Bu hadisə həm Amerikanın siyasi həyatında, həm də qlobal kripto bazarında yeni bir dövrün başlanğıcı ola bilər.

Lakin eyni zamanda bu, siyasət və biznes arasında sərhədlərin daha da silindiyini, maraqlar toqquşmasının isə gələcəkdə ciddi müzakirə mövzusu olacağını göstərir.