İsrail Hərbi Hava Qüvvələri İran ərazisinə zərbələr endirib.

Bu barədə Axios portalı mənbələrə istinadən məlumat yayıb.

“Fars” agentliyi isə bildirib ki, İran paytaxtının qərbində və şimal-şərqində partlayış səsləri eşidilib.

Tehranın imam Xomeyni adına hava limanı fəaliyyətini dayandırıb

Türkiyənin “Hüriyyət” qəzeti isə bildirib ki, İranın iki nüvə obyektində - Natanz və Fordoda partlayışlar baş verib.

İsrail ordusu bildirib ki, hədəf İranın müxtəlif bölgələrindəki nüvə obyektləridir.

Generallar həlak olub

İran mediası yazır ki, İsrailin İranın müxtəlif ərazilərinə endirdiyi hava zərbələri nəticəsində İran Silahlı Qüvvələrinin Baş Qərargah rəisi general-leytenant Məhəmməd Baqiri və İslam İnqilabı Keşikçiləri Korpusunun (SEPAH) komandanı general-mayor Hüseyn Salami ölüb.

Həbibullah Səyyari ordunun müvəqqəti qərargah rəisi, Əhməd Vahidi isə “SEPAH”ın baş komandanı təyin edilib.

Neftin qiyməti qalxıb

İsrailin İrana hava hücumundan sonra “qara qızıl”ın qiyməti kəskin artıb.

“Brent” markalı neftin iyul fyuçerslərinin qiyməti 4,28% bahalaşaraq 1 barel üçün 73,35 ABŞ dolları, WTI markalı neftin iyul fyuçerslərinin qiyməti isə 7,95% artaraq 1 barel üçün 73,03 ABŞ dolları təşkil edib.

Bundan əlavə, Asiya indeksləri kimi ABŞ indeksləri də dəyər itirməyə başlayıb. İsveçrə frankı və qızılın isə qiymətləri yüksəlir.

İrandan reaksiyalar

İran İslam Respublikasının Ali Rəhbəri Seyid Əli Xameneinin xalqa müraciətində bildirib ki, İsrail gecə ərzində İrana zərbələr endirməklə özünü acılı və ağrılı taleyə məhkum edib: "İsrail sərt şəkildə cəzalandırılacaq. Hava zərbələri zamanı bir neçə komandir və alimlər həlak olub. Onların davamçıları və həmkarları dərhal işlərini davam etdirəcəklər”.

İran Baş Qərargahının sözçüsü, briqada generalı Əbülfəzl Şekarçi bəyan edib ki, İsrail İran ərazisinə, o cümlədən yaşayış binalarına zərbələr endirib: "Tehran İsrailin ABŞ-nin dəstəyi ilə həyata keçirdiyi hücumlara sərt cavab verəcək".

ABŞ-dən mövqe

“Fox News” telekanalının jurnalisti Cennifer Griff Ağ Ev rəhbərinin sözlərindən sitat gətirib: "Amerika prezidenti Donald Tramp İsrailin İrana zərbə endirmək planlarını əvvəlcədən bildiyini, lakin ABŞ-nin əməliyyatda iştirak etmədiyini vurğulayıb.

Vaşinqton ABŞ Mərkəzi Komandanlığının (CENTCOM) yüksək hazırlıq vəziyyətində olması ilə Tehranın cavab tədbiri görüb-görməyəcəyini gözləyir.

İran cavab verərsə, ABŞ özünü və İsraili müdafiə edəcək.

Biz İranın nüvə bombasına sahib olmasına icazə verə bilmərik və ümid edirik ki, danışıqlar masasına qayıdacağıq. Baxacağıq”.