Nəsimi rayon İcra Hakimiyyətinin təşkilatçılığı ilə Rövşən Nəsirov adına 111 nömrəli tam orta məktəbdə "Suveren Tariximizin Tərəqqi ilə İrəliləyən Ali Hüquq Missiyası" adlı tədbir keçirilib.

Azərbaycan xalqının Ümummilli Lideri, müstəqil Azərbaycan Dövlətinin qurucusu Heydər Əliyevin və Azərbaycan Respublikasının ərazi bütövlüyü uğrunda canlarından keçən şəhidlərin əziz xatirəsi bir dəqiqəlik sükutla yad edildikdən sonra Dövlət Himni səsləndirilib.

Tədbiri açılış nitqi ilə açan məktəbin direktoru Jalə Hacıyeva iştirakçıları salamlayaraq çıxışında 2025-ci ilin “Konstitusiya və Suverenlik” ili kimi elan olunduğunu qeyd edərək bu mühüm ili layiqincə qeyd etməyə, hüquqi maarifləndirməyə və vətənpərvərlik ruhunda fəaliyyət göstərməyin vacibliyini vurğuladı.

Nəsimi rayon İcra Hakimiyyəti başçısının birinci müavini Gülarə Verdiyeva qeyd edib ki, Ümummilli Lider Heydər Əliyevin rəhbərliyi ilə ölkədə hüquqi dövlət və vətəndaş cəmiyyətinin əsasları qoyulub. Bu missiyanı uğurla davam etdirən Prezident İlham Əliyevin siyasətində insan hüquqlarının müdafiəsi və rifahın təmin olunması prioritet istiqamətlərdəndir. Birinci vitse-prezident, Heydər Əliyev Fondunun Prezidenti və ölkənin birinci xanımı Mehriban xanım Əliyevanın rəhbərlik etdiyi sosial layihələr və regional proqramlar bu sahədə mühüm rol oynayır, xüsusilə də həssas qruplara göstərilən diqqət cəmiyyətimizdə humanist dəyərləri əks etdirir.

Nəsimi rayon İcra Hakimiyyəti yanında İctimai Şuranın sədr müavini, ADNSU IV kurs tələbəsi Sənan Hüseynov çıxışında bildirib ki, ölkəmizdə həyata keçirilən ardıcıl və məqsədyönlü gənclər siyasəti nəticəsində hüquqi düşüncəyə malik, vətənpərvər bir gənc nəsil formalaşıb. Bu suveren gənclik Prezident İlham Əliyevin rəhbərliyi ilə aparılan siyasəti dəstəkləyir, hüquqi dövlət quruculuğunda, insan hüquqlarının müdafiəsində və ictimai-siyasi proseslərdə fəal iştirak edərək milli dövlətçiliyin möhkəmlənməsinə əvəzsiz töhfələr verir.

Məktəbin tarix müəllimi Natəvan Məmmədova isə çıxışında bildirib ki, tarix boyu Azərbaycan öz müstəqilliyi və suverenliyi uğrunda ciddi mübarizələr aparıb və bu mübarizələrin hüquqi əsasları bu gün Konstitusiyada əksini tapıb. Həmçinin, vurğulayıb ki, şagirdlərə məhz hüquqi biliklərin və tarixi şüurun aşılanması, onları dövlətçilik ənənələrinə bağlı və hüquqlarını tanıyan vətəndaş kimi formalaşdırmaq baxımından xüsusi əhəmiyyət daşıyır.

Sonda mövzu ətrafında fikir mübadiləsi aparılıb.