Balababa Rzayev: Azərbaycan dünya siyasətində öz layiqli yerini tutub [xfgiven_qirmizi] [xfvalue_qirmizi] [/xfgiven_qirmizi]
“AzərEnerji” ASC-nin prezidenti Balababa Rzayev - 2023-cü ilin oktyabrın 15-də Azərbaycan xalqının yaddaşına həkk olunacaq tarixi bir gün yaşandı. Həmin gün Prezident İlham Əliyev Xankəndi şəhərində Azərbaycan Respublikasının Dövlət Bayrağını ucaldaraq dövlət suverenliyimizi təmin etdi. Bu hadisə həm də xalqımızın 30 ildən çox gözlədiyi böyük Qələbənin rəsmi təntənəsi idi. Xankəndi şəhərində bayrağımızın dalğalanması xalqımız üçün həm tarixi, həm də emosional baxımından əlamətdar hadisədir. Hər kəs bu böyük Qələbənin sevincini ürəkdən yaşadı.
Prezident İlham Əliyev Azərbaycanın işğal altında olan torpaqlarının azad edilməsi məsələsini qarşıya bir nömrəli məqsəd qoymuşdu. Bu məqsədə çatmaq üçün hər gün, hər saat yorulmadan çalışıldı və nəhayət, 2020-ci ildə baş verən Vətən müharibəsi ilə bu müqəddəs arzu gerçəkləşdi. Ali Baş Komandanın dediyi kimi, hər bir addım bu Qələbəni yaxınlaşdırdı və bu, Azərbaycan xalqının iradəsi və gücü sayəsində mümkün oldu.
Ötən illər ərzində dövlətimizin mövqeyi beynəlxalq arenada daha da gücləndi. Azərbaycan dünya siyasətində öz layiqli yerini tuta bilən və söz sahibi olan bir dövlətə çevrildi. Prezident İlham Əliyevin rəhbərliyi ilə Azərbaycan bir çox beynəlxalq təşəbbüslərin müəllifi oldu və həm siyasi, həm də iqtisadi sahədə böyük uğurlar qazandı. Güclü iqtisadiyyat isə hər zaman müstəqilliyin əsas təməli kimi qəbul edilir.
Müstəqil və güclü dövlət olmaq üçün yalnız iqtisadiyyat kifayət deyil, güclü ordu da lazımdır. Azərbaycan Ordusunda bu illər ərzində çoxsaylı islahatlar aparıldı. Şanlı ordumuz 44 günlük Vətən müharibəsində möhtəşəm Qələbə qazanaraq düşməni kapitulyasiya aktına imza atmağa məcbur etdi. Bu Zəfər tarixin yaddaşına həkk olundu. Prezident İlham Əliyev dəfələrlə qeyd etmişdir ki, biz Silahlı Qüvvələrimizlə fəxr edirik və bu qürur həm ölkə daxilində, həm də xaricdə yaşayan milyonlarla azərbaycanlı üçün ortaq bir hissdir.
Vətən müharibəsindən sonra, 2023-cü ildə keçirilən antiterror tədbirləri də qaçılmaz idi. Ermənistanla uzun illər davam edən problemin sülh yolu ilə həll edilməsi mümkün olmadı və buna görə də hərbi müdaxilə qaçılmaz oldu. Şuşanın azad edilməsi isə Azərbaycanın daha bir tarixi Zəfəri kimi yaddaşlarda qalacaqdır. Bununla düşmən tərəfi müharibəni davam etdirə bilməyəcəyini anladı. Azərbaycanın qazandığı bu Qələbə tarixdə əbədi olaraq qalacaq və gələcək nəsillər də bu uğurla haqlı olaraq fəxr edəcəklər. Xankəndi, Xocavənd, Xocalı və Ağdərə şəhərində ucaldılan bayraq əbədi olaraq dalğalanacaq və bu torpaqlarda Azərbaycan xalqı əbədi yaşayacaq.
Zəngilan rayonunda “Sarıqışlaq” Su Elektrik Stansiyası istifadəyə verilib
Azərbaycan Respublikasının Prezidenti İlham Əliyev oktyabrın 3-də Zəngilan rayonunda “AzərEnerji” ASC-nin “Sarıqışlaq” Su Elektrik Stansiyasının açılışında iştirak edib.
“AzərEnerji” ASC-nin prezidenti Balababa Rzayev dövlətimizin başçısına görülən işlər barədə məlumat verdi.
Bildirildi ki, “Sarıqışlaq” SES Oxçuçayın üzərində kaskad üsulla tikilən Zəngilan silsiləsindəki 4 SES-dən biridir və buna qədər digər 3 SES - “Cahangirbəyli”, “Şayıflı” və “Zəngilan” Su Elektrik stansiyaları dövlətimizin başçısının iştirakı ilə istismara verilib.
Yaşıl enerji zonası konsepsiyasına uyğun olaraq tikilən “Sarıqışlaq” SES-də eyni vaxtda derivasiya borularının montajından, bünövrə işlərindən tutmuş maşın zalının tikilməsinə, açıq paylayıcının qurulmasına qədər bütün işlər tam normativ qaydalara uyğun həyata keçirilib.
Flora və faunanın qorunması üçün xüsusi qurğular quraşdırılmaqla yaradılan baş suqəbuledicidən çıxan suyun 35 faizi çay məcrasında saxlanılmaqla derivasiya boruları çəkilib və borudan çıxan suyun itkisiz şəkildə çaya təkrar buraxılması təmin edilib.
“Sarıqışlaq” SES-də tikilən maşın zalında çayda su azalarkən özünü avtomatik dayandıra bilən 2 ekoturbin quraşdırılıb ki, bu turbinlər Oxçuçayın ekoloji axımından iki dəfə artıq suyun çayda saxlanılmasını təmin edir.
Qeyd olunub ki, su elektrik stansiyasında 110 kV-luq açıq paylayıcı qurğu tikilib. Bu qurğu nəinki “Sarıqışlaq” SES-də, eyni zamanda “Şayıflı” SES-də istehsal olunan yaşıl enerjinin sistemə ötürülməsi funksiyasını icra edir. Burada həm yarımstansiya, həm də bütövlükdə su elektrik stansiyası rəqəmsal avadanlıqlarla təchiz edilərək avtomatik idarəetmə sistemi ilə təmin olunub.
“Sarıqışlaq”da il ərzində 33 milyon kilovat-saatadək elektrik enerjisinin istehsal olunması, bununla da 7,4 milyon kubmetr qaza qənaət edilməsi və atmosferə atılan 13 min ton karbon qazının qarşısının alınması nəzərdə tutulur.
Prezident İlham Əliyev “Sarıqışlaq” Su Elektrik Stansiyasını işə saldı.
Qeyd edək ki, “Sarıqışlaq” SES-in də daxil olduğu 4 SES-dən ibarət 42 meqavatlıq Zəngilan silsiləsi işğaldan azad edilən ərazilərdə yaradılan ən böyük silsilədir.
Yerli mütəxəssislər tərəfindən layihələndirilməklə, tam yeni tikilmiş 42 MVt gücündə kaskad tipli bu 4 stansiya qoyuluş gücünün 70 faizdən çox hissəsi ilə çalışır. Burada istehsal olunun enerjinin bir hissəsi daxili tələbata sərf edilir, artıq qalan enerji isə ölkə enerjisisteminə yönləndirilir. Bu da regional enerji müstəqilliyini artırır və ətraf mühitin qorunmasına töhfə verir.
Ümumilikdə isə bu günədək “AzərEnerji” tərəfindən Qarabağda və Şərqi Zəngəzurda istismara verilən 270 meqavat gücündə 32 Su Elektrik Stansiyasında hava şəraitindən asılı olan digər bərpaolunan enerji mənbələrindən fərqli olaraq, 24 saat fasiləsiz yaşıl enerji istehsal edilir.
Prezident İlham Əliyevin regionun yaşıl enerji zonasına çevrilməsi barədə qəti mövqeyinin nəticəsi kimi ölkə enerjisistemi tarixində ilk dəfə Qarabağ və Şərqi Zəngəzur regionları istismarda olan su elektrik stansiyaları hesabına ilin bütün fəsillərində xalis sıfır karbon emissiyalı bölgəyə çevrilib və elektrik enerjisi tələbatı tam həcmdə yaşıl enerji hesabına təmin edilir.
“Azərenerji” Xankəndində qapalı tipli yeni yarımstansiya tikir
Şuşadan Xankəndinə 110 kV-luq ötürmə xətti çəkilir
2023-cü ilin sentyabr ayında antiterror əməliyyatı keçirilərkən ölkə başçısının tapşırığına uyğun olaraq “Azərenerji” ASC-nin xüsusi komandası operativ işə başladı və yeni anker dayaqlar quraşdırılmaqla cəmi 4 gün içində “Şuşa” yarımstansiyasından Xankəndi və ətraf ərazilərə ilkin olaraq enerji verilməsi təmin edildi. Lakin separatçıların nəzarətində olan zaman 110 kilovoltluq xətlər və mövcud “Xankəndi” yarımstansiyası istismar müddətini çoxdan başa vurduğundan hələ o zaman tez-tez qəza açılmaları baş verir, uzunmüddətli fasilələr yaranırdı.
Məhz buna görə də bu ilin yazından başlayaraq “Azərenerji” tərəfindən Şuşa şəhərindən Xankəndiyə ən çətin dağlıq və meşəlik relyefdə 110 kV-luq ikidövrəli “Xankəndi-1”, “Xankəndi-2” yüksək gərginlikli ötürmə xəttinin çəkilməsinə start verilib. Artıq ümumi uzunluğu 11 km olan hava xəttinin çəkilməsi işi yekunlaşıb və 1,8 km məsafədə yeraltı kabel xəttinin çəkilməsi işi aparılır. Ən əsası isə Xankəndi şəhərində müasir şəhər şəbəkəsi modelinə uyğun olaraq 110,35,10 kilovoltluq qapalı tipli yarımstansiyanın tikintisinə başlanılıb. Artıq tikinti işlərinin böyük hissəsi görülüb. “AzərEnerji”nin İctimaiyyətlə əlaqələr mərkəzinin rəisi Teymur Abdullayevin sözlərinə görə “Xankəndi” yarımstansiyası işğaldan azad edilən ərazilərdə 110 kV-luq gərginlik sinifi üzrə tikilən ilk qapalı tipli yarımstansiyadır. “Belə ki, burada kabel zirzəmisindən tutmuş 110, 35, 10 kilovoltluq paylayıcı qurğulara, o cümlədən 2 ədəd 63 MVA transformatorlara qədər bütün avadanlıqlar məhz binanın daxilində yerləşdiriləcək”.
Yarımstansiyanın qapalı tipdə tikilməsi daha az yer tutmasına, avadanlıqların uzunmüddətli istismarına, müasir standartlara uyğun estetik görnüşünə, təhlükəsizliyinə və digər amillərə görə daha əlverişlidir. Yeni yarımstansiyada müasir tipli SERJİ yanğından mühafizə sistemindən tutmuş, kiber təhlükəsizliyə qədər bütün tətbiqlər quraşdırılacaq. Qeyd edək ki, “Xankəndi” yarımstansiyasının ərazisində həm də anbar, qazanxana, maşın mexanizmlərinin təmir sahəsi və başqa yardımçı binalar da tikilıir.
“Xankəndi” yarımstansiyasında işlərin yaxın aylarda başa çatması planlaşdırılır.
