“Azərbaycan Prezidenti cənab İlham Əliyevin mayın 25-də Moskvada keçirilmiş Ali Avrasiya İqtisadi Şurasının geniş tərkibdə iclasında qonaq qismində iştirakı, ölkəmizin getdikcə artan beynəlxalq nüfuzunun daha bir göstəricisidir. Qeyd olunmalıdır ki, Azərbaycan artıq uzun müddətdir ki, Avrasiya İqtisadi Birliyinin demək olar ki, bütün üzvləri ilə əməkdaşlığını uğurla davam etdirir. İstisna yalnız Ermənistandır ki, bu vəziyyətdən də itirən yenə də bu ölkənin özüdür. Əlbəttə ki, yaxın zamanlarda bu vəziyyət dəyişə bilər. Öz çıxışında cənab Prezident İlham Əliyevin dediyi kimi, hazırda Azərbaycan ilə Ermənistan arasında münasibətlərin normallaşdırılması üçün ərazi bütövlüyünün və suverenliyin qarşılıqlı şəkildə tanınması əsasında ciddi imkanlar var. Buna görə də sülh gündəliyi öz aktuallığını hələ də qoruyur. Hərçənd, Ermənistanın baş naziri Moskva görüşünün gedişində də özünü müəyyən qeyri-adekvat replikalar verməkdən saxlaya bilmədi. O cümlədən Azərbaycana qarşı dövlətimizin Ermənistan ərazilərinə göz dikdiyi barədə absurd ittihamların irəli sürülməsi, yalnız bu ittihamı səsləndirən şəxsin qeyri-sağlam təxəyyülə sahib olmasından xəbər verir. Möhtərəm dövlət başçımızın öz çıxışında işlətdiyi “dəhliz” sözünə don geyindirməyə cəhd etməklə, Ermənistanın hökumət başçısı bu dəfə də beynəlxalq siyasi terminologiyadan məlumatsız olduğunu nümayiş etdirdi. Həmçinin qarşı tərəfin daha bir əsassız iddiası Azərbaycanın guya ki, Laçın-Xankəndi yolunu bloklaması ilə bağlıdır. Dövlətimiz isə, sadəcə Ermənistanla sərhədində bütün beynəlxalq normalara uyğun olaraq nəzarət-buraxılış məntəqəsi qoyub. Bu nəzarət-buraxılış məntəqəsi Rusiya sülhməramlı kontingentinin postundan 20 metr aralıda yerləşir və bu gün həmin nəzarət-buraxılış məntəqəsindən erməni milliyyətindən olan Azərbaycan vətəndaşları, təcili yardım maşınları Xankəndi şəhərinə və əks istiqamətdə maneəsiz hərəkət edirlər. Lakin bütün bunlara rəğmən, Ermənistanın rəsmən Qarabağı Azərbaycanın tərkib hissəsi kimi tanıdığı nəzərə alınarsa, sülh sazişinə nail olmaq üçün əlverişli imkanların mövcud olduğunu demək olar”.

Bu sözləri mətbuata açıqlamasında Milli Məclisin deputatı Aqiyə Naxçıvanlı deyib.

Daha sonra deputat qeyd edib ki, Prezident İlham Əliyevin çıxışında Azərbaycanın Avrasiya İqtisadi Birliyi ölkələri ilə iqtisadi əlaqələrinin həcmini əks etdirən önəmli açıqlamalar eyni zamanda ölkəmizin getdikcə artan imkanlarını nümayiş etdirir: “Möhtərəm dövlət başçımızın öz çıxışında təqdim etdiyi və Azərbaycanın Avrasiya İqtisadi Birliyi ilə əlaqələrinin xarakterini müəyyən edən konkret rəqəmlər həqiqətən də diqqətəlayiqdir. Aydındır ki, Azərbaycanın Şərq-Qərb və Şimal-Cənub nəqliyyat yollarının coğrafi kəsişməsində yerləşməsi və ölkəmizin son illər ərzində yaradılmış nəqliyyat-logistika infrastrukturu bütün istiqamətlərdə daşınmaları həyata keçirməyə imkan verir. Bu gün Azərbaycan Xəzərdə 50 gəmidən ibarət ən böyük ticarət donanmasına malikdir. On beş milyon ton yükün daşınmasına hesablanmış Ələt Dəniz Limanı yaxın vaxtlarda modernləşdiriləcək və yükaşırmaların həcmi 25 milyon tona çatdırılacaq. Azərbaycanın gəmiqayırma imkanları bu gün həmçinin digər Xəzəryanı ölkələrə də təqdim olunub. Bakı gəmiqayırma zavodunda Xəzər üzrə qonşularımızın sifarişlərinin qəbul edilməsi üzrə hazırda danışıqlar və fəal iş aparılır. Bu gün Azərbaycanda 8 beynəlxalq aeroport fəaliyyət göstərir ki, onlardan ikisi işğaldan azad olunmuş torpaqlarda – Füzuli və Zəngilan rayonlarında son iki ildə edilib. Hazırda azad olunmuş Laçında doqquzuncu beynəlxalq aeroport tikilir və 2025-ci ildə istismara veriləcək. Bütün bunların nəticəsidir ki, ölkəmiz illik 500 min ton yük dövriyyəsi ilə regionda ən iri hava yük donanmasına malikdir. Azərbaycan həmçinin strateji əhəmiyyət daşıyan bir çox beynəlxalq logistik layihələrin, o cümlədən “Şimal-Cənub” nəqliyyat dəhlizinin fəal iştirakçısıdır. Bakı-Tbilisi-Qars dəmir yolu Avropaya, həmçinin Türkiyənin Aralıq dənizi limanlarına çıxışı təmin edir. Azərbaycanın təşəbbüskarı olduğu və beynəlxalq dəmir yolu marşrutlarının bir hissəsi olacaq Zəngəzur dəhlizinin yaradılması isə, ölkənin əsas hissəsini Naxçıvan Muxtar Respublikası ilə birləşdirəcək və eyni zamanda da bu layihə bütün regionun sürətli inkişafına səbəb olacaq. Cənab Prezident İlham Əliyevin dediyi kimi, Azərbaycan tam iqtisadi müstəqilliyə nail olub və bu, dövlətimizin uğurla həyata keçirdiyi müstəqil xarici siyasət kursunu aparmaq imkanına sahib ola bilmək üçün tələb olunan ən mühüm amillərdən biridir”.

Həmçinin A.Naxçıvanlı Prezident İlham Əliyevin 25 may tarixində Moskvada Rusiya Federasiyasının Prezidenti Vladimir Putinlə görüşünün ölkələrimiz arasında səmimi münasibətlərin mövcudluğunu təsdiq edən daha bir önəmli amil olduğunu vurğulayıb: “Bu gün Azərbaycan ilə Rusiya arasında ikitərəfli formatda beynəlxalq əməkdaşlıq uğurla inkişaf edir. Bu əməkdaşlıq istər Müstəqil Dövlətlər Birliyinin, istərsə də digər beynəlxalq təşkilatların platformalarında davam etdirilir. Rusiya Prezidenti Vladimir Putinin öz çıxışında Ulu Öndər Heydər Əliyevin yubiley tədbirlərinin həm Moskvada, həm dövlət hakimiyyət təsisatlarında, həm də Rusiyanın regionlarında fəal şəkildə keçirildiyini deməsi xalqımıza və Ümummilli Liderin xatirəsinə ehtiram və yüksək hörmətin əlamətidir. Qeyd olunduğu kimi, ölkələrimiz arasında münasibətlərin hazırkı səviyyəsinin əsası da məhz Rusiya Prezidenti Vladimiz Putin və Ulu Öndər Heydər Əliyev tərəfindən qoyulmuşdur. Rusiya Prezidentinin 2001-ci ildə Azərbaycana səfərindən sonra münasibətlər keyfiyyətcə yeni səviyyəyə yüksəldi. Bu gün isə artıq bu münasibətlər müttəfiqlik səviyyəsindədir. Məhz bu səbəbdən də Azərbaycan ilə Ermənistan arasında münasibətlərin normallaşdırılması işində Rusiya önəmli rol oynayır”, - deyə Aqiyə Naxçıvanlı fikirlərini tamamlayıb.