“BBC jurnalistinin “Dağlıq Qarabağ: İnsanlar çörək növbəsində huşlarını itirirlər” reportajı, həmçinin ifaçı Serj Tankyan və separatçı Artak Beqlaryanın Azərbaycana qarşı ittihamların səsləndirildiyi televiziya verilişi əslində xəbərdən çox şou xarakteri daşımaqla bərabər, Böyük Britaniya-Azərbaycan münasibətlərinə ciddi xələl vurmağa yönəlmişdir. Öz Nizamnaməsinin belə ziddinə gedən BBC bu verilişlə ikili standartlara yol verdiyini sübut eləmiş oldu.”

Bu sözləri aia.az-a verdiyi açıqlamada Nəsimi RİH-nin yanında İctimai Şuranın sədr müavini Eltun Süleymanov deyib.

Müsahibimiz qeyd edib ki, “BBC-nin belə dəst-xətti jurnalistika prinsiplərinə aşkar sayğısızlıqdır, sivil media dəyərlərinə həqarətdir. Azərbaycan cəmiyyəti hesab edir ki, jurnalistika manipulyativ missiya daşımamalı, azad sözün imkanlarından sui-istifadə yolu tutmamalıdır. BBC və onun Azərbaycan xidməti bu tələbə əhəmiyyətsiz yanaşır, Qarabağdakı separatçılardan qalma tör-töküntülərə tribuna verir, onların söylədiklərini böyük canfəşanlıqla yayımlayır, nəticə etibarilə qeyri-obyektiv davranaraq, əsil həqiqətləri arxa plana keçirir.
Yaxşı olardı ki, BBC belə vəziyyətdə qərəzsiz mövqe göstərsin və əsil həqiqəti dünya ictimaiyyətinə çatdıra bilsin.
Necə olur ki, 30 il müddətində Azərbaycana qarşı olan qərəzli münasibəti ermənilərin xalqımızın başına gətirdiyi faciələri, soyqırım faktlarını bircə dəfə də işıqlandırmayan bu televiziya birdən-birə ermənilərin yanında olur və onların mövqeyini sevə-sevə işıqlandırır? Əlbəttə ki bu sualın bircə cavabı var ki, o da Azərbaycana münasibətdə qərəzli mövqenin olmasıdır.
BBC-nin bu fəaliyyəti dövlətlərin ərazi bütövlüyünə və suverenliyinə təhdidi adiləşdirir, normaya çevirir, dünyanın müxtəlif bölgələri üçün də son dərəcə təhlükəli presedent yaradır. Bu, sülhə və əminamanlığa, asayişə və firavanlığa yad təmayüldür. Dünyada məşhur, jurnalist etikası sahəsində örnək sayılan media qurumunun avantürist siyasətin alətinə çevrilməsi böyük təəssüf hissi doğurur.”

Eltun Süleymanov sonda bildirib ki, “BBC təcili şəkildə Azərbaycanın mövqeyini təqdim etməli və üzr istəməldir. Əks təqdirdə bizə qarşı qərəzli münasibət sərgiləyən bu televiziyanın Azərbaycanda fəaliyyəti məhdudlaşdırılmalıdır. Azərbaycanın təklif etdiyi ərzxaqdan imtina edən ermənilərin separatist mövqeyindən bir kəlmə də olsa danışmayan bu televiziya nəyə görə belə məlumatlarla dünya ictimaiyyətini çaşdırmasına da ayadınlıq gətirməlidir.”