Daşqın İbrahimov: Mehriban xanım Əliyeva – Humanizm, Mədəniyyət və Milli Dəyərlərin Zirvəsində Parlayan Şəxsiyyət [xfgiven_qirmizi] [xfvalue_qirmizi] [/xfgiven_qirmizi]
Sabirabad rayon Moranlı kənd ərazi icra nümayəndəsinin müavini Daşqın İbrahimov - Azərbaycanın Birinci vitse-prezidenti, Heydər Əliyev Fondunun prezidenti, UNESCO və ISESCO-nun xoşməramlı səfiri Mehriban xanım Əliyeva dövlətçilik tariximizdə müstəsna yeri olan, öz fəaliyyətində milli dəyərlərə sadiqliyi, xalqına bağlılığı və humanist prinsipləri ilə seçilən nadir şəxsiyyətlərdən biridir. Onun bütün həyatı və fəaliyyəti Vətənə məhəbbət, xalqa xidmət və insanlığa sədaqət nümunəsi kimi qiymətləndirilir. Avqustun 26-da qeyd olunan doğum günü yalnız bir şəxsiyyətin yubileyi deyil, həm də Azərbaycan qadınının dünyada qazandığı nüfuzun, mərhəmət və zəngin mənəvi irsin bayramıdır.
Mehriban xanım Əliyevanın fəaliyyəti müstəqil Azərbaycanın hərtərəfli inkişafına yönəlmiş strateji və humanitar istiqamətləri ilə seçilir. O, hələ illər öncə Heydər Əliyev Fondunun rəhbəri kimi başladığı layihələrlə maarifçilik hərəkatını yeni mərhələyə yüksəltdi. Təhsil sahəsində minlərlə məktəbin, uşaq bağçasının inşası və yenidən qurulması, tədris proqramlarının müasirləşdirilməsi, gənc nəslin bilik və bacarıqlarının inkişafına göstərilən dəstək, ölkənin gələcəyi naminə böyük bir missiyanın həyata keçirildiyinin göstəricisidir.
Eyni zamanda, səhiyyə sahəsində irəli sürülən təşəbbüslər, talassemiyadan və digər irsi xəstəliklərdən əziyyət çəkən uşaqlara yaradılan şərait, müasir diaqnostika və müalicə mərkəzlərinin fəaliyyəti bir daha təsdiq edir ki, Mehriban xanım Əliyeva insan sağlamlığını dövlət siyasətinin mühüm prioritetlərindən biri kimi ön planda saxlayır. Onun təşəbbüsü ilə həyata keçirilən xeyriyyə layihələri minlərlə ailəyə ümid işığı, minlərlə uşağa sağlam həyat bəxş edib.
Qadınların cəmiyyətimizdəki rolunun güclənməsində, onların sosial, iqtisadi və ictimai sahələrdə fəallığının artmasında Mehriban xanımın müstəsna xidmətləri vardır. O, öz fəaliyyəti ilə Azərbaycan qadınının müasir dünyada pozitiv və güclü obrazını formalaşdırıb. Mehriban xanım Əliyeva milli-mənəvi dəyərlərlə beynəlxalq humanitar dəyərləri birləşdirərək, qadınların cəmiyyətin inkişafındakı rolunu daha da möhkəmləndirib.
Mədəniyyətimizin dünyada təbliği də onun çoxşaxəli fəaliyyətində mühüm yer tutur. UNESCO və ISESCO səviyyəsində reallaşdırılan layihələr, qədim abidələrimizin bərpası, musiqi və incəsənətimizin beynəlxalq miqyasda tanıdılması Azərbaycan mədəniyyətinin yeni üfüqlərə çıxmasına şərait yaradıb. Xüsusilə işğaldan azad olunmuş ərazilərdə tarixi və dini abidələrimizin bərpası, mədəni irsimizin dirçəldilməsi yalnız milli yaddaşın qorunması deyil, həm də xalqımızın qürurunun bərpasıdır.
Dünya miqyasında isə Mehriban xanım Əliyeva Azərbaycanın humanitar diplomatiyasının siması kimi tanınır. Onun təşəbbüsü ilə reallaşdırılan beynəlxalq layihələr, müxtəlif qitələri əhatə edən xeyriyyəçilik tədbirləri ölkəmizin dost dairəsini genişləndirir, mədəniyyətlərarası dialoqu möhkəmləndirir. Mehriban xanım Əliyevanın fəaliyyəti nəticəsində Azərbaycan yalnız enerji və iqtisadi potensialı ilə deyil, həm də humanist dəyərləri ilə tanınan ölkəyə çevrilib.
Bu gün Mehriban xanım Əliyeva həm dövlət idarəçiliyində, həm də ictimai-sosial həyatda örnək bir liderdir. Onun fəaliyyəti cəmiyyətin bütün təbəqələrini – şəhid ailələrini, qaziləri, məcburi köçkünləri, uşaqları, yaşlıları və xüsusi qayğıya ehtiyacı olan insanları əhatə edir. O, mərhəmət və humanizmi ilə insanların qəlbində dərin hörmət və rəğbət qazanıb.
Avqustun 26-da qeyd olunan doğum günü münasibətilə Azərbaycan xalqı bir daha Mehriban xanım Əliyevanın çoxşaxəli fəaliyyətini yüksək qiymətləndirir. Onun adı artıq dövlətçilik tariximizdə humanizmin, milli dəyərlərə bağlılığın və Vətənə sədaqətin rəmzi kimi yazılıb.
