Firudin Həsənov: Qurban bayramı birlik, şəfqət və dövlətə sədaqətin təcəssümüdür [xfgiven_qirmizi] [xfvalue_qirmizi] [/xfgiven_qirmizi]
Qurban bayramı təkcə dini bayram deyil, həm də bəşəri dəyərlərin, insanlıq borcunun, paylaşma və mərhəmət hisslərinin təntənəsidir. Bu müqəddəs günlərdə milyonlarla müsəlman bir araya gələrək Allaha yaxınlıq, insana sevgi və ehtiyacı olanlara yardım ruhunu yaşadır. Azərbaycan xalqı üçün də Qurban bayramı təkcə dini deyil, həm də milli-mənəvi bir dəyərdir və bu dəyərlərin qorunmasında, yaşadılmasında yerli idarəetmə strukturları da mühüm rol oynayır.
Daşkəsən rayonunun Bayan kəndində bu dəyərlərin yaşadılmasına rəhbərlik edən şəxslərdən biri də kənd bələdiyyəsinin sədri Firudin Həsənovdur. O, yalnız idarəçi deyil, həm də kəndin mənəvi sütunu, vətəndaşlarla sıx təmasda olan, onların dərd-sərinə şərik olan bir şəxsiyyət kimi tanınır.
Firudin müəllim üçün Qurban bayramı sadəcə qurbanlıq kəsilməsi ilə yekunlaşmır. Onun üçün bu bayram insanın öz daxili aləmini saflaşdırdığı, qonşusunu, tanımadığı ehtiyac sahibini sevindirdiyi, şəhid ailələrini və qaziləri yad etdiyi mübarək günlərdir. Hər il olduğu kimi bu il də Firudin Həsənov bayram ərəfəsində kəndin şəhid ailələrini və müharibə iştirakçılarını ziyarət edib, onlara mənəvi dəstəyini çatdırıb. Onun təşəbbüsü ilə bu ailələrə bayram sovqatları paylanıb, qurban əti kənddəki aztəminatlı ailələrə çatdırılıb.
Kənd bələdiyyəsinin fəaliyyəti təkcə sosial yönümlü deyil. Firudin Həsənov rəhbərlik etdiyi qurumla birgə kəndin abadlaşdırılması, yolların təmiri, su xətlərinin yenilənməsi, həyət evlərinin önünün abad saxlanması üçün sakinlərlə əməkdaşlıq çərçivəsində müxtəlif layihələr həyata keçirir. O, xüsusilə gənclərin və uşaqların vətənpərvərlik ruhunda tərbiyə olunmasına diqqət yetirir, kənd məktəbi ilə bələdiyyə arasında sıx əməkdaşlıq quraraq maarifləndirici tədbirlər keçirir.
Firudin müəllim üçün kəndin hər sakini bir ailə üzvü kimidir. O, yaşlıların dərdinə şərik çıxır, gənclərə yol göstərir, ailəsini çətinliklə dolandıranlara əl tutur. Bu insani münasibət və yerli idarəçilik yanaşması, onu kənd camaatı arasında həm hörmətli bir rəhbər, həm də doğma bir insan kimi tanıdıb.
Bayram münasibətilə verdiyi təbrikdə Firudin Həsənov bildirir:
"Qoy bu Qurban bayramı hər bir evə ruzi, firavanlıq və sevinc gətirsin. Şəhidlərimizin ruhu şad olsun, qazilərimiz daim dövlətin və xalqın diqqətində qalsın. Hər zaman birlikdə olaq, bir-birimizə dayaq olaq. Çünki bu torpaq bizimdir, bu xalq bizim ailəmizdir."
Bayram günlərində belə rəhbərlərin təşəbbüsü və ürəkdən gələn səyləri kənd cəmiyyətində həmrəyliyi gücləndirir, Azərbaycan dövlətinə və dövlətçiliyinə olan sədaqətin daha bir nümunəsini ortaya qoyur.
