Azərbaycan teatr sənəti əsrlər boyu milli-mənəviyyatımızın, xalqın düşüncə tərzinin və mədəni kimliyinin ayrılmaz bir parçası olmuşdur. Bu sənət aləminin inkişafı isə, şübhəsiz, həm yaradıcı insanlardan, həm də onların fəaliyyətinə şərait yaradan fədakar rəhbərlərdən asılıdır. Məhz bu qəbildən olan şəxsiyyətlərdən biri də – Azərbaycan Dövlət Akademik Rus Dram Teatrının direktoru, Əməkdar mədəniyyət işçisi Ədalət Hacıyevdir.

Ədalət Hacıyev teatr rəhbəri olmaqla yanaşı, eyni zamanda bu sənəti dərindən hiss edən, onu sevən və yaşadan bir sənət adamıdır. Onun adı bu gün yalnız idarəçi kimi deyil, həm də milli mədəniyyətin inkişafına xidmət edən intellektual ziyalı kimi böyük rəğbətlə anılır. O, səhnənin görünən tərəfi qədər, görünməyən tərəfinin də mühüm yükünü üzərinə götürmüş, teatrın ruhunu qoruyan şəxsiyyətə çevrilmişdir.

Ədalət müəllimin rəhbərliyi dövründə teatr yalnız klassik tamaşaları təqdim etməklə kifayətlənməmiş, həm də cəsarətli rejissor yozumları, müasir dramaturgiya nümunələri və beynəlxalq layihələrlə sənət məkanında dinamik və rəngarəng bir mövqe qazanmışdır.

Lakin Ədalət Hacıyev təkcə sənətə deyil, həm də cəmiyyətə və vətəndaşlara qarşı məsuliyyətli yanaşması ilə seçilir. O, xüsusilə şəhid ailələri və qazilər mövzusunda göstərdiyi yüksək həssaslıqla, bu sahədə nümunəvi ziyalılardan biri kimi tanınır. O, daim şəhid ailələrinin və qazilərin yanında olur, onların mədəni həyatda iştirakını təşviq edir, müxtəlif sosial layihələrdə onların fəal iştirakını təmin edir.

Teatrda təşkil edilən xüsusi tədbirlərdə şəhid ailələri və müharibə iştirakçıları üçün ayrılmış yerlər, onların rahatlığı üçün göstərilən diqqət və mənəvi qayğı, Ədalət müəllimin insanlara olan dərin hörmətinin bariz nümunəsidir. O, bu yanaşması ilə Prezident İlham Əliyevin şəhid ailələrinə və qazilərə göstərdiyi xüsusi qayğı və diqqəti mədəniyyət sahəsində də layiqincə davam etdirir.

Cənab Prezident İlham Əliyev dəfələrlə qeyd etmişdir ki, şəhid ailələri və müharibə iştirakçıları dövlətimizin diqqət mərkəzindədir və onların rifahı hər zaman əsas prioritetlərdən biri olaraq qalacaq. Bu siyasət təkcə sosial layihələrlə deyil, eyni zamanda mədəniyyət, təhsil və səhiyyə sahələrində də dəstəklənir. Ədalət Hacıyev də bu siyasətə sadiqliyini öz fəaliyyətində əks etdirərək, sənət vasitəsilə vətənpərvərlik ruhunun yaşadılmasına və bu insanlara olan mənəvi borcun ödənilməsinə öz töhfəsini verir.

Ədalət müəllimin bu humanist yanaşması, onun sadəliyi, təvazökarlığı və insanlara olan ehtiramı həm teatr kollektivində, həm də tamaşaçılar arasında böyük hörmət və rəğbət qazandırmışdır.

Bu gün Azərbaycan teatrında baş verən bir çox müsbət dəyişikliklərin arxasında məhz belə düşüncəli və fədakar sənət rəhbərlərinin əməyi dayanır. Ədalət Hacıyev – səhnənin görünməyən işığıdır. O, bu işığı yalnız teatr salonlarına deyil, insan qəlbinə də saçmağı bacaran bir sənət adamı və vətəndaşdır.

Onun fəaliyyəti gələcək nəsil sənətçilər və rəhbərlər üçün örnək təşkil edir və əminliklə demək olar ki, Azərbaycan teatr tarixi Ədalət Hacıyevin adını daim qürurla və minnətdarlıqla xatırlayacaq.