Ağstafa Rayon İcra Hakimiyyətinin başçısı Seymur Orucov Dünya Azərbaycanlılarının Həmrəyliyi Günü münasibətilə xalqımızı təbrik edərək bu əlamətdar günün Ulu Öndər Heydər Əliyevin tarixi qərarlarından biri olduğunu vurğulamışdır. O, həmrəyliyin Azərbaycan xalqının birliyinin və vəhdətinin simvolu olduğunu, bu günün milli-mənəvi dəyərlərimizi qorumaq və gələcək nəsillərə ötürmək baxımından böyük əhəmiyyət daşıdığını qeyd etmişdir. Seymur Orucov, həmçinin Prezident İlham Əliyevin rəhbərliyi ilə Azərbaycanın inkişafının və xalqımızın rifahının təmin olunmasında həmrəyliyin mühüm rol oynadığını bildirərək, hər bir azərbaycanlının bu birliyə öz töhfəsini verməsinin vacibliyini ifadə etmişdir.

Eyni zamanda, Seymur Orucov, AZAL-a məxsus təyyarənin qəza ilə üzləşməsi xəbəri ilə bağlı dərin təəssüf hissini ifadə edərək, qəza nəticəsində yaralananlara tezliklə sağalmalarını arzulamış və şəhid olanlara ALLAHdan rəhmət diləmişdir.

Seymur Orucov həmrəyliyin, milli birliyin və təhlükəsizlik məsələlərinin vətəndaşların gündəlik həyatında əsas dəyərlər olduğunu qeyd edərək, hər kəsi birgə vətənpərvərlik və məsuliyyət hissi ilə fəaliyyət göstərməyə çağırmışdır.

Heydər Əliyev Mərkəzində saat 12:00 və 15:00-da keçirilən bayram şənlikləri Ağstafa Rayon İcra Hakimiyyəti və Azərbaycan Təhsil İşçiləri Azad Həmkarlar İttifaqının Ağstafa rayon şöbəsi ilə birgə təşkil olunub. Bayram tədbirində şəhid və qazi övladları, xüsusi qayğıya ehtiyacı olan, eləcə də ev şəraitində təhsil alan uşaqlar, məsul şəxslər və ictimaiyyət nümayəndələri iştirak ediblər.

Tədbirdə Ağstafa RİH başçısı Seymur Orucov, millət vəkilləri Ülviyyə Ağayeva və Azər Əmiraslanov, Azərbaycan Təhsil İşçiləri Azad Həmkarlar İttifaqı Respublika Komitəsinin sədrinin müşaviri Elşad Novruzov çıxış edərək uşaqları qarşıdan gələn bayramlar münasibəti ilə təbrik edib, onlara dövlətimiz tərəfindən göstərilən xüsusi diqqət və qayğıdan, Vətənə layiqli övlad kimi qayğısız böyümələri, hərtərəfli inkişaflarının təmin edilməsi istiqamətində görülən işlərdən bəhs ediblər. Qeyd olunub ki, uşaqların hərtərəfli inkişafının təmin olunmasına yönəldilmiş dövlət uşaq siyasətinin əsası hər zaman sonsuz sevgi, minnətdarlıq və qürurla xatırladığımız müasir müstəqil Azərbaycanın qurucusu, əbədiyaşar lider Heydər Əliyevin adı ilə bağlıdır. Vətən və xalq üçün gərəkli vətəndaş kimi yetişmələrini hər zaman diqqətdə saxlayan Ümummilli Lider uşaqların ən böyük himayədarı, sevimlisi olub. Əminliklə qeyd edirik ki, Ulu Öndərin yaratdığı və gələcək nəsillər üçün miras qoyduğu ənənələr Prezident İlham Əliyev və Birinci vitse-prezident Mehriban Əliyevanın rəhbərliyi ilə azərbaycanlı uşaqların taleyində əhəmiyyətli rol oynayacağına zəmanət verir. Heydər Əliyev Fondu tərəfindən uşaqlara dövlət qayğısının gücləndirilməsi, onların rifah halının yaxşılaşdırılması ilə bağlı vacib proqramlar və layihələr reallaşdırılır.

Bakı Bələdiyyə Teatrının nümayiş etdirdiyi “Qış nağılı” tamaşası, Şaxta baba və Qar qız, eyni zamanda, digər nağıl qəhrəmanları personajlarının iştirakı ilə keçirilən müxtəlif əyləncəli proqramlar uşaqların böyük sevincinə səbəb olub.

Şənliklərdə iştirak edən 800 nəfər uşağa bayram hədiyyələri təqdim olunub.